Міхасёвы прыгоды

Надакучыла дзецям зіма:

Ім разгону зімою няма.

      Маркотна Міхасю,

      Алесю і Ясю,

      Валодзю, Андрэю

      I ўсім, хто дурэе

      I хоча разгону —

      Ну, Юрку, Сымону,

      Марынцы, Тацянцы,

      Аленцы, Мар'янцы,

      I Інцы, і Юльцы,

      Натальцы, Ганульцы —

      Ну, словам, дзяўчатам

      I хлопцам,

      Тым хватам.

Сагналі ахвоту на санках,

На лыжах, каньках і лядзянках.

      Зімою забавы

      Не дужа цікавы:

      Марозы, завеі,

      I нос пасінее,

      Чуць выскачыш з хаты

      На холад зацяты.

      Хваробы зімою

      Ідуць чарадою:

      То свінка, ангіна,

      Адзёр, шкарлатына

      Ды біч-жываглыт

      Люты, злы дыфтэрыт...

Надакучыла дзецям зіма,

I чакае вясны іх гурма.